Noticias da Orquestra e os seus compoñentes
Tentando cumprir un dos seus principais fins, a normalización da cultura
musical de Galicia, a Asociación de Gaiteiros Galegos (AGG), ente que
representa non só a gaiteiros, senón tamén a todo tipo de músicos
tradicionais, bailadores e demais xente implicada no folclore musical galego,
organiza o primeiro congreso de ensinantes de música e baile tradicional.
O obxectivo fundamental deste congreso é reunir ós principais actores do
ensino da música e baile tradicional (profesores de educación primaria e
secundaria, conservatorios e ensino non regrado) nun marco que permita a discusión
das futuras liñas a seguir para que o noso patrimonio musical sexa posto en
valor e transmitido dun xeito moderno e eficaz ás novas xeracións. A AGG
pretende tamén, mediante a organización deste congreso, chamar a atención
sobre a importancia socioeconómica que o sector do ensino da música
tradicional galega ten na nosa comunidade. A este respecto exporanse, neste I
Congreso de Ensinantes de Música Tradicional Galega, as conclusións do estudo
que a fundación Son de Seu, en Colaboración coa Dirección Xeral de Creación
e Difusión Cultural da Xunta de Galicia e a AGG, ven de realizar para
documentar a actividade de tódolos ensinantes dedicados a este eido que existen
actualmente na nosa comunidade.
Este relevante congreso está patrocinado pola Dirección Xeral de Creación e
Difusión Cultural da Xunta de Galicia, así como pola Concellería de Cultura
do Concello de Santiago de Compostela. Na súa organización colaboran ademais a
AS.PG e a CIG, ademais das tres Universidades Galegas. Nel poderanse escoitar un
total de dez relatorios levados a cabo por importantes investigadores e docentes
galegos que tratarán temas tan interesantes como a situación actual do ensino
da música tradicional achegando modernas propostas para a súa adaptación ó
novo contexto urbano; o ensino da gaita de fol, do baile tradicional, da percusión,
do canto e da zanfona; así como a aplicación das novas metodoloxías de ensino
e linguaxes musicais o ensino da música e baile tradicionais galegos. Estes
relatorios alternaranse con sesións plenarias onde se discutirán de xeito
aberto a situación actual do ensino da música e danza tradicionais, así como
as novas propostas e o futuro que agarda a este tipo de ensino. Os asistentes a
este congreso presenciarán tamén un concerto didáctico a cargo de Pablo
Carpintero, no que se porá de manifesto a grande riqueza e posibilidades didácticas
do instrumentario tradicional de Galicia.
O I Congreso de Ensinantes de Música Tradicional Galega celebrarase no
Auditorio de Galicia, en Santiago de Compostela os días 18 e 19 de Novembro e
vai dirixido a todo tipo de docentes, xente interesada neste tipo de ensino e,
especialmente, a estudantes universitarios, para os que a asistencia contará
como créditos de libre elección para as Universidades de A Coruña e Vigo.
A inscrición, cun custo de 10€ para asociados e estudantes e de 25 para
outros interesados, poderase levar a cabo a través do portal da AGG (http://gaiteirosgalegos.com)
ou ben por correo enviando o boletín de inscrición á seguinte dirección: Rúa
Alfonso XIII-7º, oficina nº8, 36002-Pontevedra.
O noso compañeiro Ivan Costa ven de lanzar o seu primeiro disco en solitario, na sua faceta de gaiteiro. O seu primeiro traballo discográfico titúlase "Ávrego", e foi grabado unicamente por Ivan interpretando el mesmo todos os instrumentos. O Cd esta estructurado en duas partes ou "caras", A e B, facendo honor ós antigos discos de vinilo. A primeira das partes esta adicada ás pezas recopiladas de cancioneiros e gaiteiros tradicionais, mentres que a segunda esta formada por pezas compostas polo propio Ivan.
O disco sae baixo o sello discográfico Edicións do Cumio. Poderedes atopar mais informacion en: www.cumio.com